Informazioni sull'opera
majìas de luna
luna puma 'e columba
endiosada 'e pintare sas laras pius lizadras
luna corra de boe
muliache cun cadena d'isteddos traza traza
luna falche 'e messare
neulas de laores sàmbene 'e pabaules
luna conchizu 'e chelu
sonat s'Avemaria ch'imparat a sinnare
luna andalieni
ijone andalidorra
luna lados de pane
bogadu dae 'ucca e dadu a bagamundu
luna mesu marengu
iscadriadu in bula d'usureri abbramidu
luna perra de conca
ammacchada dae semper de nignerias noizzas
luna meidade 'e mundu
alluscadu de paghe furada dae coro
luna andalieni
ispantu andalidorra
luna chiza de Gèsus
faladu dae sa rughe pro recuire s'ama
luna crista de Giuda
pendulende dae nae garriga de remursu
luna cara d'ermosa
disizosa 'e carignos orizados de sonnios
luna conca de mortu
torràda pro aumentare su fadu de sa vida
luna andalieni
dillìriu andalidorra
luna làmpana 'e oro
azzesa pro ammalare ojos de bisadore
luna pedra de mola
chi maghinat morinzos de onzi paristoria
luna
trona d'olvidu
bèntulat soledade a su disterru 'e istellas
luna brajeri 'e lughe
isparta pro fuire tenebras d'isprefundu
luna andalieni
misteriu andalidorra
| Titolo | MAJÌAS DE LUNA |
| Sezione | |
| Autore | Franco Cocco |
| Nome | B20050015 |
| Anno | 2005 |
| Argomento | |
| Descrizione | |
| Lingua | |
| Editore | Premio Ozieri |
| Contributore | TecnoService |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 2005 |
| Copertura | Italia, Sardegna, Logudoro |
| Diritti | Comune di Ozieri - Premio Ozieri |
| Analisi del Testo |