Luna Park


Benei
benei a lestru
accudei totus a innoi:
est torrada sa Giostra.
Ajò a giogai in s'Ottovolanti...
in s'Autoscontru...
innì c'est su Gir' 'e sa Morti
innoi
su Tir'a segnu
cun su bersagliu e tantis
tantis fusilis.
Toccai
andeus a sparai unu tiru
duus
tres
centu
milli tirus...
Pum! Pum! Pum!
Is piccioccus si spassiant
gioghendi a sparai.
Sparant a is froris
de giardinus festosus
sparant a is froris
de arrugas operosas
sparant a is froris
de zittadis derrutas.
Poberus froris:
pansius
accalamaus
appetigaus
streccaus
e imbruscinaus in su ludu.
Froris messaus appenas obertus

froris de beranu
annegaus in arrius
de sanguni innocenti.