Informazioni sull'opera
lu biddisò
In d-un cuzòru umbròsu di giardhìnu
brìnca li biddisò di rattu in rattu
un borarèddu e torra... acchì ha lu nidu
i' la meragranàdda be' cuàddu
e pa futtìmmi fazi un giru mannu
poi zi torra in callòggu era arrìggiddu
abà féimmu i' lu rattu m'è abbaiddendi
cumenti mi vuressia priguntà.
-Acchì no bòri purutu i' lu zéru
v'è ventu bonu pa burà a luntanu
buràddu hai tantu i' la to' pizzinnìa
acchì no bòri un poggu impari a me?-
-Vuraristhia burà ma sogg'isthraccu
e l'ari mei so' aizu "arrugginiddi"
ma... lu me cori no s'è arresu ancòra
mi piazarìsthia tantu di prubà.-
L'era cussi dizendi candu
a un trattu
lu terefonu sona priputentì
-So l'ottu e m'abì dàddu appuntamentu!
No dimmi chi sei ancora zappittèndi...-
-Mi pòngu la gianchètta e sogg'iscèndi
...l'era soru dizendi a d-un pizòni
d'un pinsamèntu chi m'è intraddu in cabu
chi bòru eu puru... si tu sei cun me.-
| Titolo | LU BIDDISÒ |
| Sezione | |
| Autore | Gigi Noce |
| Nome | B20040066 |
| Anno | 2004 |
| Argomento | |
| Descrizione | |
| Lingua | |
| Editore | Premio Ozieri |
| Contributore | TecnoService |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 2004 |
| Copertura | Italia, Sardegna, Logudoro |
| Diritti | Comune di Ozieri - Premio Ozieri |
| Analisi del Testo |