LI 'AACCANZI ILLA ME CASEDDHA


Era minuréddha

l'ultima di la carréra

dui stanzi

un'addananzi
un'addarétu
ma tutt'e dui cu lu balconi
chi daggjiani illa colti
e
acchiddhà
illu Fossu di li Tulchi.
Chissa sì ch'éra la nostra
e no la casa manna di Piuaca.

Ill'appusentu
lu sulaggju
e li trai di nibbaru
dissingjati da lu 'entu
e curretti da la pióla

li sbiancaami a veldi;
in cucina addarétu
no vinn'aìa bisongju
chi da li téuli
dia iscì lu fumu
ill'accindì la ciminea.

Tamente lu pamentu
diami arrangià dungj'annu

ch'era a ismaldu

e l'infundiami a sprìnduli
pa lu friscu e pa la pulvara;
la ziddh'invecci
no si pudia zappulà
chi subbitu bisungjaa
a fa fócu pa la cena
di fasgióli e pomi.