LAMENTU


Si mi lamento già nd'hapo rejone

ca so sempre gherren'a marranìa
contr'a pelèas in dogn'istajone.

Cominzàd'est sa mia tribulìa
pro mala sorte o volontad' 'e Deu
a tres'annos perdend'a mama mia.

Da-e tando su coro est in annèu:
pro m'aggravare pius sa tristura
a chimb'annos mi morit babbu meu.

A li toccare simile isventura

creo chi che a mie isfortunadu
in su mundu no b'hapat criadura.

Ma proite m'han goi castigadu?
Mi campo de suore e sacrifiziu
e m'agato innozente cundennadu.

Sa vida est pro me unu suppliziu
e m'aggiunghet pius dispiaghere
a m' 'ider isolad'in d'un'ispiziu.

Cun s'iscopu 'e leare mestiere
bi so istadu pius de vint'annos.
Daboi chi leadu hapo muzere

zessados los creia sos affannos

ma no hapende sa sort'in favore
dispiagheres suffro pius mannos;

rezzìdu hapo su colpu mazore
perdende un'ispos'a s'improvvisu
che cando si la pijat un'astore.

Paret signale chi mi dat avvisu
ch'in custa vida mia tribulàda
su meu pattiment'est già dezisu.

Ma non creo de l'haer meritàda
custa pelèa 'e sa vida terrena

né isco chie mi l'hat assignàda.

Hoe m'assistit solu zent'anzena
chena mi dar'affettu nè consolu

so in s'aggregu de "Domo-Serena"

isetende sa morte trist'e solu.