LA VICCIAIA

Canti pinsamènti chi ti venini candu càra la séra

Pensi a la pizzinnìa
a la giubintùra ch'è passadda

a comu trimmurèggi che fiàra di candéra

finza chi la zèra no' s'è tutta cunsumàdda.

Tandu ti n'abbìzi ch'è arribìdda la vicciàia
E cumprendi chi no' sei più nudda
in dugna lòggu
E dibènti accrucciupìddu comu era giàia
E li bàrri ti si fazzini rui che lu fòggu.

Canti n'aggiu visthu in vidda méa sòri che lu càni
Ippassigèndi i la carréra pa' ammazza lu tèmpu

caschùnu no' v'ha mancu un còrru di pani
ne un'istrhàzzu pa' cuvacassi da lu ventu;

caschùnu postha in cabu lu sumbréri pa' lu frèddu
e la bustha di l'ipésa pa' passàzzi una mezz'òra

caminendi pianu pianu
diricàddi che lu brèddu

lu càni liàddu a trunnéu è l'ischusa pa' isthà fòra.

Abarìsthiani vuruddu un carignu
una paraura bòna
E isthà umpari a li cristhìani pa' intindissi impusthànti
Inveci v'hani sòru facci lònghi
nieddi che padizòna
Finza a candu tocca la pinziòni: fìgliòri bibànti.

Caschùnu era osthurànu
viddràggiu o panattéri
Cunsumèndi finza l'ossi pa' campà la famiglia

abà no' so' più nudda: ubrigaddi a fa' l'orèri

si abussiani pudùddu l'abaristhiani cotti i la grabìglia.

Pòbari vecci
pizzìnni d'asthri tèmpi
di una vòstha

si abussiaddi pudùddu turrà in daréddu cu' lu cabu

a trent'anni
chena più piglià pinziòni i la postha

abarìsthiaddi vuruddu favi ciamà un'asthra vòstha babbu.