ISCHUZZURENDINNI DA LU PIUBARU L'AMMENTI

Cosa sarà lu muiddu chi v'aggiu i li zirembri...
Siguramenti no po' assè una zinzura:
m'azza a cabbu chissa poesia di Giacomo.. ."Silvia
rimembri..."
e subbiddu lu muiddu diventa già una mimmura...

Rimusi in un carasciu di la menti
mi pari d'intindilli ancora ciari:
rimori
fiagghi
vozzi e sintimenti

da Pascha d'Apriri finzamenti a carrasciari.

Pusadda i lu gianniri di Via Umberto

la carrera di la mea giubintura

ini abìami la buttrèa di robba a metru
e fasdhetti cuvacaddi su misura


arriggìmmi da li giogghi a volthi mi piazzìa
pà intindì li soni di la sera
chi abìani lu saòri di la pizzinnìa
e no l'isgiabbiddura di chisth'èra.

E un coipu di fuettu ischuttu all'aria
era musigga in dugna cantunadda

impiubaradda da l'ammenti di la sthoria
è andadda pessa e già immintiggadda.

Pedi pisuddu pà l'isthracchidduggina

fattu a lu paddronu peggiu d'un cucciucciu

cozzu cabaddu
pienu di baùggina
no l'iscìa un tunciu tirendi lu barrocciu.

Cosa sarà lu muiddu chi v'aggiu drent'in cabbu...
Chi possia assè una zinzura lu soggu ch'è una faura:
debi d'assè una vozzi
la di babbu
chi da Chissu Loggu m'è dizendi una paràura...