Invocazione

M'imbenuggio, comente dogni die,
Nostra Signora bell'e su Saludu,
cust'est s'ultimu azzudu,
s'ultima grascia, chi dimandho a tie.

A Pes de cust'altare, imbenugiadu,
cantas boltas, o Vergine, m'has bidu,
t'appo sempre pedidu
su regalu c'ancora non m'has dadu.

Ti dimandho saludu solamente
non chelzo tancas e nè zarras d'oro,
ma paghe, paghe vera a custu coro.
E atteru niente.

Ahi!... E cantas boltas, male sanu,
po Te, app'affrontadu sas tempestas,
t'appo sempre prommissu milli festas
a Rosariu in manu.

T'appo prommissu caddhos curridores
e tres missas a musica cantadas,
chentu feminas nostras collanadas
chi t 'attin sos fiores.

Custa zente de sambene gagliardu
ten sezzere sos caddhos pius famosos
in s'Aldia ten parrer sos isposos
un esercitu sarda.

Sos ferros ten zoccare in sa cudina
e falan sos pastores da sa Serra,
visitare ti ten da dogni terra,
e t'invocan, Reina.

In s'Altare tes parrer un'istella,
cun collanas calendh'in sas petorras,
ma su saludu candho mi lu torras, No
Nostra Signora bella?

A tie alzo sos oggios, Mama 'e Deu,
pentidu de sa ruzza pizzinnia:
Misericordia, o Vergine Maria,
de custu viver meu!