Inventami sa lughe

Custa notte

istellas comente lagrimas
iscolan da-e su chelu
e supra sa cara mia
trasparentes perlas
impetuosas
che issas
iscadrian
aumbrendemi sas tempras

pro pianghere
sa "lontana" amiga mia.
Canta potenzia
su chi narat

cantu iscolpit
su chi no narat

cantu dolore
su refudu.
Tenen alas
sos pensos
e pees
sos sentimentos

bolan che mariposas
da-e fiore in fiore
chirchende sa dulcura.
Oh chelu!...
inventami sa lughe

s'isplendore
chi solu in sonnios
si potet admirare

illumina sos ojos
e su coro meu

disusos...
a sa jubilea vida.