IN S'ORU 'E SU RIU

Una musica bandulera accumpanzaiat sa dansa de su 'entu
e un'isposa pizzinna luzzigaiat su maninfide de ismaltu;
sa reina de sos fiores profumaiat sas carreras niadas
e una cadena longa de ispigas doradas arramaiat sos tramuntos.

In s'oru 'e su riu cantaiat una mala nova de brunzu
e un'abbrazzu de lunas flessuosas assempiaiat unu mortorzu;
un'isbruffulu 'e sale infogadu infundiat unu molinarzu
e unu lacu de marmaru romanu attiraiat unu massaju.

Fariseos e pianghijolos chena coraggiu

carvonajos mascarados de 'idru suladu;
eo mi nd'isciucco sas manos
neit Ponzio Pilato

eo mi nd'isciucco su coro
neit s'amore.

Giudeos e carrabusos chena nidu

dugones ispintos da-e forzas divinas;
eo ando in-d-unu logu solianu
neit su Deus de s'Universu

eo so su pulighe chi abbattit s'elefante.

Una musica bandulera accumpanzaiat sa 'oghe de sas fadas
e una rana pisedda aisettaiat su prinzipe de ramine;
sa reina de sas arpas buffaiat in sa funtana 'e su sonu
e su reflessu 'e sos astros in s'abba incantaiat sa morte.

In s'oru 'e su riu drommiat una virgine istracca
e un'abbrazzu de canes famidos assempiaiat un'isveglia;
un'isbruffulu 'e sambene pistu aundaiat sa paza
e unu sepulcru de marmaru cristianu assannaiat un'anzenu.

Aliseos e Filisteos nemigos de sos Ebreos

bascos doppios arridados da-e su peccadu;
eo mi nd'isciucco sas manos
neit Ponzio Pilato

eo mi nd'isciucco su coro
neit s'amore.

Ternos e pentimentos infustos de serpentes

cumpanzos de mesa domados cun calighes de 'inu

eo ando a sa 'ia 'e su mare trasparente
neit su Deus de s'Universu

eo so sa manu manna chi pintat su destinu.

In s'oru 'e su riu cantaiat una mala nova de brunzu.