Informazioni sull'opera

TESTO


Gosos pro su "Babbu Mannu" nostru torradu a lughe noa

In sa Rughe 'e su dolore
ses torradu luminosu

Babbu Mannu gloriosu
sias nostru salvadore!

In s'orrendu tribunale
chie t'haiat indenna
ti l'hat fatta sa cundenna
cun su cuntzettu infernale

chi non tenet uguale
s'inferotzidu furore.
Babbu Mannu Glorosu
sias nostru salvadore.

Ti l'han posta subr' 'e palas
una Rughe
e in sos chizos
sa corona 'e sos fastizos
fatta cun ispinas malas

ma Tue amore regalas
in mesu a tantu terrore.
---------------------

In sos pès e in sas manos
cun tres giaos t'han ficchidu
a cussa Rughe ch'hat bidu
S'abbeffu 'e sos disumanos
chi fin de fide profanos
e de coro peccadores.
---------------------

In sos costazos
ladinas
sun sas feridas ch'han puntu
sa carena sen'ammuntu

sa corona de ispinas

su pianta 'e sas Femìnas
attittendedi o Signore.
---------------------

In s'ora chi s'agonia
frimmat in coro su sonu
pedis a Deus perdonu
pro sa zente 'e mala cria.
E a s'ispiru Maria
ti lu frobbit su suore.
---------------------

A sas tres dies
sa vida
isterret passu de nou.
E siat su Nomen Tou
pro d-ogn'anima increspida
faru lughente e guida

sias nostru Redentore.
---------------------

Oe rilughet che prenda
s'immagine Tua Santa
e sa 'idda totta-canta
t'hat in coro che sienda.
Oh Babbu Mannu ses renda

ses faru chi dat lugore.

In sa Rughe 'e su dolore
ses torradu luminosu

Babbu Mannu gloriosu
sias nostru salvadore.

SCHEDA DELL'OPERA
Titolo GOSOS PRO SU BABBU MANNU NOSTRU TORRADU A LUGHE NOA
Sezione  
Autore Antoni Maria Pinna
Nome A20040011
Anno 2004 
Argomento  
Descrizione  
Lingua  
Editore Premio Ozieri
Contributore TecnoService
Tipo  
Formato  
Fonte Premio Ozieri
Relazione Concorso Premio Ozieri 2004 
Copertura Italia, Sardegna, Logudoro
Diritti Comune di Ozieri - Premio Ozieri
Analisi del Testo