Furfurinu Senza Coa


Est già altu su sole

m'incamino derettu sa caminera
in s'adde de sos suelzos
ùe passo dies da-i annos
ca
es logu 'e friscura
b'hat silenziu
pagh'e recreu.
Poi un'iscuta addinanti meu
'ido unu furfurinu solu solu

attentu lu abbaido
faghet dolu
li mancana pumas dae sa coa
non podet pesare su 'olu.
Ite cosa l'est suzzessu?
Chie ndhe l'hat istrazzadu
custa parte delicada
nezzessariu a bolare
liberu in aera e lugore.
Forsis hat imbestu male
cun carchi felinu iffidiadu
in giogu de cazza attrividu?
Opuru sa disgrascia subida

su riscu at haere affrontadu
unu lestru rapace astoreddu

c'haiat brama 'e afferrare
fazile
unu pastu licchittu?
Mi faghet pena su furfurinu!
M'acculzio a iss'e mi gruscio
cun delicadesa et intentu
a li faghere unu carignu
ma fuede a brinchittu.
Pianu
torro m'acculziare
nendheli cosa a susurru:
istà tranquillu cun megus
non appas timoriu perunu.
Ti gito a logu de cunfortu
pro ti sanare s'istropiu
gai torras' in libertade
a bolare da-i maja in maja

poi subra s'arvure fozida
ti faghere 'e nou su nidu:
asciare in sas'aeras liberu.