Frore de bona sorte...
(Cantu a sa nugoresa)


Ses nuscu 'e poesia
lucore 'e dilichia
ube braghera bibet sa fortuna. (1)
Jana d'anticu amore
chin tramas de lentore
intesses bestes a sole e a luna.
In nottes isteddadas
chin sas pupias cantas serenadas.

Frore de bona sorte
binches peri sa morte
chin sa durcura tua 'e sa bellesa
chi luchet a ispantu
che corona 'e santu
in àgheras pintadas d'innidesa...
Intro su lettu
nuda

ti pesso disizàndet'a sa muda...

Su samben in sas benas
tra risittos e penas
curret pessande a tìbe
terra sana.
Ti disizo che rosa
profumada
dizzosa
d'amore friscu
bìrghine funtana. (2)
Lampizu manzanile (3)
mi carinnas de coro su jannile.

Unu malune 'e frue (4)
si ses cuntenta tue
t'intrego chin sos nuscos de su coro;
a sapore 'e padente
e de abba currente
in s'intranna 'e sa terra
prend' 'e oro:
fruttu sanu 'e titta
de sa natura-mama beneitta.

Commo chirco un'umbrache
in s'oru 'e unu nurache
pro pasare sos pessos in sa mente.
Sun che traschia 'e bentu
no accattan apentu
si tue
sole meu
ses assente.
No han pasu in neddue
s'intro su sinu non los ninnas tue...



1) Braghera = boriosa
spocchiosa.
2) Bìrghine = vergine
pura
immacolata
3) Lampizu manzanile (o grina) = bagliore
4) Prue = latte cagliato
coagulato.


Jubanne Piga
Carrera Volta
16
03100 Nugoro
Tel.0784 35817