FOGOS de DISAURA

Fumu e fiammas èst un inferru;
su lepere
erittu e sirbone
fuen lestros cun disisperascione
dae cussu chisciu
ferale inserru.

U'èst passadu silvas chena vida

runcos de rù
prunitza e ozastros
e truncos d'elighe
chercos
pirastros

totue sa Natura èst ferida.

Bird'in logu
tottu nieddu pighe

un'isterrida de disolascione

più's b'hat ne murta ne olidone
ne chessa
inistra e caralighe.

Comente umbras bestidas a luttu
èst su buscu cun sos ratos a chelu

tottu ammuntadu de tristu velu
tessid'in chijina d'ortij'alluttu.

Ranchidas lagrimas falan'in coro

raffian s'animu chi mal'ispina

dagh'ido padentes tott'in chijina
dae Campidan'a su Logudoro.

Sensos istrintos in punzu d'ispinas
pro cust'iscura manna disaura

destruinde tottu lassat tristura
cada monte
badde
cada fainas.

Cun pena m'acculzi'a unu rattu
e cun sentidu feridu happ'idu
proteggind'osos puzon'in su nidu
punz'e chijina su fogu nd'hat fattu.

Frastimat Deus custa malasorte.
U'èst sa melodi'e sos puzones?
su melare de crabas e anzones?
tottu èst mudore
cantat sa morte.

«Firmamus manos bruttas de malignu
Armadas de lomminu e vilesa

cun brutzu firmu presu in lestresa
prò canzellare barbaru disignu.»

«Chi su destinu nò siat inzertu

de s'arcaicu patrimoniu sardu

defensu primu che det essere tardu
mai siat tzimentu o desertu.»