FABA ARRIBISALI E " VINU

La faba arribisali cu lu binu

àndani a brazzetta umpari

in ca si sia camminu;

fatti a cumpari e cumari

s'isthimani cun rasgioni

e cumenti dui antigghi innammuraddi,
da lu disthinu liaddi,
si basciani cun tutta la passioni.
Fideli amigghi di lu zappadori
da li tempi di Mosè,
tràttani ancora bè
cu li signori.
Megliu duna midizina ca si sia
curani a fondu la malincunia:
fazzini cantà canzoni,
fazzini baddà e ridi
e alla fini màndani a drummì
li passoni.
Isthrascinaddi i lu lettu
n'esci un'accoldhu parfettu.
La faba è democratica, mi pari,

lu binu è populari

ed è pà chissu chi, misciaddi umpari

ti pari d'intindi

un cumiziu chi fazzi LEMMEPI


LU COCCOIDDU A PIENU

NO ABIA mai magnaddu
lu coccoiddu a pienu
cundiddu cun casciu grattaddu
e cottu a foggu lenu lenu,
cu la bagna di pumati
pà no attaccassi a fondu
e poi serviddu in piatti
tondi cantu un mappamondu
Dugna cuccoiddu un
succiaddu cun allegria
e una tezzina di sossu
pà tìnilli cumpagnia.
L'amigghi piu distinti
cuntesini fin'a vinti.
ma eiu, fendi lu tontu,
aggiu biddu senza contu.
Erami in zincu i la banca
bè assintaddi e magnendi,
tutti in tubaglia bianca,
di pulitica discutendi
eppuru.... mi soggu isciddaddu
solu....i lu lettu cuscaddu.


LI CAZZADORI

Si v'è categoria bè intunadda
é propriu chidda di li cazzadori
chi so sempri d'accoldu e bon'amori
pa dizidì la di di l'abisthura;
ca la vò ciara e ca la vò oschura,
pa Brottu megliu un mesi attizzipadda,
Zuniari vò pusthalla a cabidannu,
paPreddu a santuaini anda fissadda,
Vizenti vò cazzià in luni e giobi
o solamenti i li di chi piobi
Tant'aburottu pa fa mancu dannu
a chiddi dui pobari animali
commu lepari e branizzi isthanzilai
In tutta la ziddai
no vi n'è unu chi digghia veriddai
Cicciu vantea un fusili ispaziali
chi fazzi a colpu l'unu fora mali;
già è un poggareddu fanfarroni
però ti zitta sempri tisthimoni.
Si pa casu a manzanili
tira o ibaglia un leperu a cuili
chisthu è un guai da no contessi mai.
candu Agniru cazziendi entra in un loggu
tuttu piantaddu a sindria e a miloni
(ifusthuneddi e pobari paddroni)
ti pari chi passaddu sia lu foggu
No è chi no aggia chi magnà,
anzi no li manca mai l'ariustha,
ma lu piattu chi megliu eddu gustha
è lu chi all'altrhi tocca di pagà .
Torra a casa a sirintina
cu li dulori a un cummaru,
lu saccapani pienu di cuggummaru,
di pumati e di pera cammuscina,
e l'indumani a li so amigghi dizi
cun risaredda istracca ma felizi
e e cun gran cunvinzioni:
"n'aggiu ammazzaddu più d'una duzzina
e aggiu fulminaddu tre mazzoni."