Est Zuighe solu Deu

un'istriulu...
in s'orulu 'e sa notte...
su listincu 'e su tempus
hat tazau sa lughe'e s'ispera...
d'un'anima
innida 'e peccados

chi chircat una mamma
naschia chin coro'e attarzu


Sa cara'e su entu
sulat a pittu 'e una janna
chircande un'apilliu supra una terra
prena 'e birbillios.

Lughes de casca mortu
allattan
sa mesu porta 'e unu cunventu
a bellu a bellu...
sa Luna bocat una lantia
po illuminare sa naschimenta
chi tuit atturzina
in sos mirfattos luados de su mundu


E interi s'egoismu noale incanneddau
lacrimat...e lacrimat... s'istoja 'e istoria.

Istintos de vida...
si moffen'a rilentu
chircande s'affettu
in sa ninnannanna 'e su tempus

e irgrammios... irgrammios...
ischidan sa natura areste

e pranghien sas feras in sas nevrosas
frnas de sa notte.

Intas'a cando sa figura beneitta
d'unu prode bessit'a campu
e vardat in s'iscuru a ojos de chelu sa puresa 'e sa vida


dae s'imboddiu 'e sos pannos frittos
duas... maneddas
.. s'ampulan...ischidas

cheret'abrazzare unu babbu... unu babbu bonu po s'eternidade...



Tonino Fancello
loc.Sos Tusorzos -08022- Dorgali
Tel.0784-94487.