EST TORRADU SU SOLE

Est torradu a risplendere su sole
su chelu est dae nou luminosu

su creadu est torradu armoniosu
in sa magica immensa lughe sua.


Sos montes chi si 'asan cun su chelu
e sa terra abbrazada est dae su mare

unidos
paret cherzan innalzare
innos de gioia a su noale incantu.


Ca est torradu su sole!
Disperdinde sas nues
chi cuaìan su chelu
e nos rendian sa terra
malinconica e fritta

cun manzanos de gelu
e bentos de traschìa.


Ma como
est torradu su sole!
E alligros rivivene sos campos
cun erbas e fiores coloridos
e s'intendet dae nou
cantare s'amorosu russignolu.
Ite serena gioia
ite consolu
custa dulche melodia

chi 'estit de poesia
tottucantu su creadu.


E accò sas mariposas!
Tantu amenas e galanas

danzende danzas arcanas
dae fiore in fiore.
Paren fadas de amore
gai diligas
pintadas

chi ralligrana su coro
de s'omine chi ammirat

con ojos incantados

custu magicu ispantu 'e su 'eranu.


Grascias! Dulche natura soberana

pro custa gioia immensa chi nos das

chi nos pienat s'anima 'e dulzura
e nos invitat a viver serenos

cun ideales de paghe in su coro
e de amore pro tottu su creadu.


PRIAMO ARCA
Nato ad Abbasanta (OR)
il 25/07/1929.
Emigrato. Res. a: 10064 Pinerolo
Via Carmagnola 37. Tel. 0121-321044.