E lassade ch'andene

E lassade ch'andent
sos faeddos nostros!
Missatzeris
de una cultura etnica
raighinada in una Terra
da-e sas memorias antigas!
Lassade chi bolent
liberos e innotzentes
che-i sas undas pasidas
de su 'entu
eternu amigu
'e sos dies nostros.
Isse assunessi
est liberu
de andare e de cantare
sos cantigos suos genuinos

e cantat
gosìe

a putzones e fefus
in sas birdes silvanas

cantat a sas àes assoladas
in chima a sos roccarzos

puru a sos pisches cantat

cando brullat
cun sas undas de su mare.

Cant'aimis cherfidu
ponner sas alas
a sos faeddos nostros?
Faghelos lomper tottube
che-i sas undas de su 'entu
e narrer a tottu su mundu:
custos no' sunt faeddos ebbia:
sunt su limbatsu 'e unu populu
fieru de aer in sas benas
ischintiddas de samben
eredadas
dae sos prodes nuraghesos

unu populu
semper in cumbatta
pro affrimmare
sa bera identidade sua.
in custu mundu revessu
e avaru 'e giustitzia.