CUNFESSIONI

Nottesta puru sa luna nd'est bessìa
a m'allui torra sa 'ia
de Cumandamentus e Pretzetus
chi un'òrta scidìa arrespetai.

M'ia bolli" cunfessai...

Su pentzamentu currit a Fustei
chi in su scurìu 'e su coru
M'aparessèis bestìu de perdonu:
-In nomine Patris... Da quanto tempo?
- De diòra!
-Qua!i peccati?
(Sempri cuddu
dd'ia boll'arrespundi

apu disigiau s'arrob'e is àtrus)

-Allora
figliola!
Titìas de bregùngia m'atruessant sa peddi:
-Don Siddi...
no bandu prus a missa
no iscìu cumpadéssiri un'ofesa
s'umilesa at pèrdiu frori e folla
sa beridadi no est prusu
sa spiga sinzilla chi arricàt sa lolla
e tragu
a bortas cun fidi atras a isténtu
is Cumandamentus chi m'Eis imparau
aici bivu mali
Don Efis...
no mi lasseis a sola.
- Figliola ricordi il catechismo?
- Sissi!
- Allora dimmi
Dio sa tutto?
-Déus iscìt totu
is pentzamentus nostrus puru...

Sa manu si pesat lebia e frima
coment'e candu si certàt de su sagrau
a cunfrima de unu donu no abetau
- Ego te absolvo...
E coment'e tandus
in mimi
svanèssit 'ònnia timorìa.