Cuaddus...

Fiat ananti 'e su potabi
scampaniàu de su ferreri
chi fatu fati... a pipia
mi firmarmu a castiai
is cuaddus
in abetu pasìdu
firmus ... po ddus ferrai.
Cuaddus passentziosus
bònus ... che su" boi "
de su poeta mannu

mi setzìa in d-una perda
assentàda che in su scannu

dannu timendi chi ddis fadessint.
Cun cussu arresigai
de su ferreri fitianu e capatzi
abrighendi is ferrus
i arremacendi totus is aciòus

spantàda biemu is cuaddus
asuta'e su traballu chen"e dolus.
Ddus connoscemu beni
arrubiastus
castàngius
opuru nieddus
baius
murrus o biancus.
Mi pariat chi issus puru
mi castìessint... e in su coru
e me is ogus ligessint
toni 'su chi
ddis iap'essi 'òfiu nai.
In sa 'ia custumànta a passai
a ogus bàscius ... rassinniaus
traghendu biaxis de loris carriaus

o cubidinas fragosas 'e binnenna.
Si fuìat s'ora chi passamu
avatu 'e is cuaddus
a sa scarèscia ... incantàda
e furriendu a domu mi buscamu
su strùnciu e mancai una scantrexiàda

...e s'est bolau su tempus...
chi oi torrat...i ariseu... m'amajiàda



Rosanna Podda
Nata a sorgono il 03/08/43
ind. via G. spano n.8
09124 Cagliari