CIAU

A passus lestrus seu imbuccau
in su cancellu becciu 'e campusantu

vetti su sinnu de sa gruxi hat rallentau
s'andai miu assubentosu
in mes' 'e cussus nominis mai olvidaus.
I cipressius incarreraus undulantis po s'araxi
fiant infrissius de raius de soli
mandaus de su celu po ammostai
is tumbas a unas a unas

e fra is tantis...
cussas de is poberus
scarescias e spollincas chi pediant
vetti sa limusina de un'orazioni.
Scioddau de s'angustia de s'olvidu
m'accumpangiada su nudda camminendi

finzaschì lompiu a sa tumba 'e is genidoris
cun s'orazioni recitada sen' 'e boxi
hia portau s'omaggiu cun is froris.
Casi fessit torrau a ismasciu
su tempus cosa mia

hia liggiu cun sa menti unu fueddu
chi hia scrittu insaras in sa losa
tremi tremi cun manu de pipiu:
Ciau...
Fiat cussu unu presagiu?
Forzis fiat su fueddu chi su Signori
hiat pronunciau saludendi

biendiddus intrai prexaus in Paradisu.