CHIRRIOS E AMMENTOS

Chen'ammentos ite semus?De istajone in istajone nos tramudamus onzi olta
ma daboi de nd'aere irraighinadu imbidias e disamistades
ue amus a pasare sa conca?

M'ammento s'edade passada dae minore
in sa idda de artigianos impiegados massajos e pastores
sas carrelas impedradas de 'oghes
sas pigadas e sas faladas currende / dae unu chirriu a s'atteru gioghende:
S'Ispiritu Santu-Campu 'e Fiores-Sa Niera-Su Marralzu
Rennu-Sa Piatta de sas Iscolas-Colte Reale-S'Oltu Mannu
Santu Sebastianu-Santa Rughe-Santu Alentinu-Sa Funtanedda
Sa Turra-Santu Marighe-Su Rondò-S'Alzoledda
Sutta Casteddu-Cuccuruddù-Sorighes-S 'Impiccadu
cantas brigas e abbratzos amus lassadu
tra una casadina e unu mossu 'e pane ammoddigadu
ponzende fattu a s'istintu de sa connoschentzia
dae sa limba a s'italianu saltiende sa timidesa e su coraggiu
ticchirrios e lagrimas innotzentes in sas caras signadas dae sos 'entos
milli rieddos de arrejonamentos.

M'ammento sas mascaras a carrasegare
comporadas cun risos e pagos minudos
comente chi nudda e tottu podiat capitare
a cussos noos angheleddos rujos...
Sa fiocca pro lassare peittas de alligria / pro iscaldire uccas de zimineas
manos frittas e pes famidos de camineras contos de zente liberada e presonera...
Su entu arridu de s'istiu / chi moviat carrelas cortes e binzas
comente undas de mare su trigu / un 'imbreaghera reveltida subra sas palinzas
sas primas peleas de unu re e de sa reina sua...

M'ammento a s'attonzu su nuscu de sa ua
a Sant'Antoni in troppa a chircare un'appozu tra sas roccas
daboi s'andalieni a sa basciura / pro istudare su sole de su coro onzi tristura
in su mare mannu de sa vida / pessamentos criados cun ispantu e fadiga
e daboi a torrare a su contu de su serradore / fio unu pitzinnu minore...
Cantos passos perdidos in sa ia Manna / in s'isettu de unu signu o de unu saludu
de unu emmo chi tardaiat at arrivare tue granda / ed eo sempre pius mudu...

M'ammento s'otziu de su mesudie / isterrujadu subra sa sedda de su monte
dae oriente a occidente lantaia / un'istrabicu pajmu de ojada
pius a taldu tra sas lughes appiccadas / a s'iscuru su sero chircaia
sas lunas perdidas in sa chijina de su foghile
tra sas fiamas de su coro unu nidu sas peraulas giustas pro non brujare

pessende a tie...



Salvatore Pintore