CHIMBANTATRESE

Si no arriscas
nat su ditzu sardu
pische non piscas,minore o maduru.
E si cheres mezoru in su futuru
lea su coro e fache s'aconcada:
frundil 'a secus de sa barricada
e curre a lu collire si as azardu!

Ma si tiras sa fune troppu a forte
naran ancora "de tzertu si truncat".
Però s 'omin 'abistu no irbruncat
istand'attent'a ue ponet pese.
No as cumpresu? Su chimbantatrese

s'insistis galu
ti daet sa morte.

Irgonza! Irgonza manna! M'an contadu
chi as lassadu a fizos e muzere
sentza pane in sa mesa.Deppo crere
chi t'an sequestradu domo e ramene
e su tanchittu chin su bestiamene
pro duos soddos til'an pignoradu ?

Poveru conchi boidu! No ischias
chi un'azardu simil'est ruina?
S 'Istadu
allegru
ti fachet rapina
de su ch 'as triballadu chin suore.
Si perdes benes
anima e onore

ite ti restat de su chi tenias?

E poi... a bi pensare! Est farzidade
chi cantu prus istentat a bessire

s'occasione ch'as pro t'irrichire
aumentat impare a su ritardu.
Ti cherzo narrer a su riguardu

cal'est sa zusta e santa veridade.

Si onzi orta sos ch'essin a fora
sun solu chimbe
sa percentuale
supra 'e noranta est semper uguale
fintzas si t'an cumbintu 'e su contrariu.
Lassa sos sonnos e s'immaginariu
e torr'a pes in terra... Est fintzas ora!

Fache su sapiu
ajò
ponemi mente.
Joca un'euro ebbia chi a su nessi

si depes bincher
binches su matessi

però
si perdes
non perdes niente!