Informazioni sull'opera
CANZONU E NINNIU A S'ANTIGA
Dromi fizu meu
e sa ninnia
faghe serenu
in dulche riposu;
mai de nudda sias bisonzosu
e non ti tocchet nessuna maladia.
Dromi prenna cara! semper serenu
sias in su sonnu
o puru abizu.
de malesa no apas assimizu
e sias de bontade semper prenu.
E crescas bellu
sanu e forte!
Apas de tribagliu bona gana!
E onzi bella femina bajana
cando ses mannu
ti fatat sa corte.
Potas ricu meda diventare
possidente de tanta calarina.
Dae monte finzas a sa marina
apas terrinos de poder allevare
tantos cadditos
vera razza sarda
sa pius antiga! sos Giarinos.
E mai pes
in sos tuos terrinos
bi ponzan
caddos de razza bastarda.
Diventes unu bonu domadore
e chi potas contare tra sos mannos.
Sos caddos tuos chi bincan sos pannos
sos c'an in Sardigna pius valore.
T'enzas semper bonas istasiones
siat in tribagliu che in recreu.
E t'auguro chi su mundu intreu
comporen dae te sos istallones.
E canno an'a passare in rassigna
tottu sa calarina preziosa
azzerten ca sa raza pius famosa
sun sos bellos cadditos de Sardigna.
Dromi
sienda mia
e serenu
dulche e pasidu su sonnu mantene
e apas salude e donzi bene
su cantu bives
in su mundu terrenu.
Chi Deus atzetet sa pregadoria
chi mamma t'est fatende dae coro;
ca de ti esser mamma mi onoro
a ninnia
gioa mia
a ninnia.
Titolo | CANZONU E NINNIU A S'ANTIGA |
Sezione | |
Autore | Francsco Piga |
Nome | A20040010 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |