CANDU SUMINAVAI LA ME TANCA


M'ammentu
a volti
lu laogliu meu
chi suminava a tuli
i la me tanca
li bòi spani cu la steddha bianca
tiravani lu solcu beddhu intrèu.
La notti prigava sempri a Deu
d'avè pani e ricattu i la me banca.

I la terra
saltainaccia e ruttìa
s'infilava l'albadda luccighendi
cu l'araddu di legna laurendi
li chevi a eva e soli li spaglìa

caddriggi ben pogu ni faggìa
da lu mangianu a sera
sempr'andendi.

Candu lu soli daggìa la caladda
mi cuntimplava bè chissa sienda

cum paglia e tanti giunti di pruenda
cinavani li bòi i la siradda

e da casa
duranti la nutadda

pinsav'a ripiglià chissa faccenda.

La vaddhi e la cussoggia s'alligrava
candu nascìa tuttu lu laori
e radiggi sbrangava i lu me cori
chi a volti
finz'a taldu
v'imbarava
e dugna scamparizzu vildiggava
la me faddigga di tantu sudori


S'ingrugava lu seddhu in canna pinta
cun spighi beddhi
i lu mesi di branu

candu giumpìa e dura era la granu
paria d'oru la tanca
dipinta

cun missaddoggia bona e tanta grinta
da lampadda missava pianu
pianu.

N'aggiu fattu mannoni e rimiaggi
tagliaddi da un rustuggiu dimizzaddu

pa dugna incugna sempri aggiu sgubaddu
fendi aglioli in tutti li custaggi.
Avà la tanca drommi in santa paggi
v'è la scurìa e loggu disuladdu.

Solu lu ventu passa a fuggiddura
girendi fogli e fraschi a vicevessu
araddu e bòi
tuttu aggiu pessu
impari a l'anni di la civintura.

ARADDU