CANDU MORINT IS OGUS

Arrimàda s'emotzioni
de sa circhiòlla
e saludau su sciòru
de su scorigadroxu
manus
in circa de formas amigas
spimpirìnant su scorìu
mesurendi is lacanas
de su disterru.
Surrùngiu de coloris
su nuscu de is froris

disigiu de màginis
is arremòrius

In custu mengianu
chi arricit ciùlus allirgus

t'intendu spramau e provu
a intrai in sa pesadìglia tua
ma giai mi firmu
stramudìu de s'arretumbu
de su prantu scorau.
E seu prus tristu
amigu miu

poita hapu mellus cumprèndiu
e m'est grai su ti sciri
in podéri de su foddìni
chi scùlat is tintas de su spantu
e ti biri sprapeddendi
s'ogu fridu in circa de su celu.
Ma no totu est tumba

ca s'anima bìstit de luxi
e illùminat is bisus.

No arrennèghist su tuu

amigu caru
poita
apègus
bisionis e arregordus
bìvint in su coru
e no tènint abisongiu de fraca
po si movi in su scorìu.