Informazioni sull'opera
BOLARE IN DASEGUS
Da-e unu letargu profundu e longu
che-i sa vida mia
unu manzanu
m'apo a ischidare pitzinnu
e apo a bolare in dasègus
lezeri che una neula in s'aera
a ispereare dae s'altu
una terra divessa
in d'unu tempus de un'ateru incominzu.
Apo a bider da' inìe
cun ojos de candore
unu mundu jucundu e de appentu
inùe su risu at alenu claru
e su piantu isvenat su dolore.
Apo a cantare de nou su sole
sa luna e sas istellas
ch'imprentan de incantu s'universu.
Apo a currer de nou in sos padros
fioridos e profumados de isperas.
Apo a bider calare da' su chelu
s'abba pro samunare custa terra
da-e s'asprore ch'est addolimada
e a istudare sas fiamas
ch'alluinan e devoran
s'asseliu e sa paghe
Apo a iscultare su mare
sas boghes de sas undas
ch'an semper ammajadu
noales mentes galu in fioridura.
Ma custa edade grae chi mi gito
a dolu mannu meu
mi forzat a restare
solu in sos pannos de sa fantasia:
crudele utopìa chi mi lassat
in s'ispiju 'e sa vida
cust'immagine mia allizada!
Ahi preneta dolente chi m'asserras
cuddu viver de nou in su tempus
cun sufferta tristesa
mi rendo contu chi m'as dissipadu
s'alenu friscu de sa cara mia!
Titolo | BOLARE IN DASEGUS |
Sezione | |
Autore | Portas Mario |
Nome | B20040084 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |