Informazioni sull'opera
AVVIDEZZI...BABBU NOSTHRU
S'ibbàgliu... m'avarèddi a curriggì""...
cussì ha ischuminzàddu lu cammìnu
tuttu in azzàdda
cù la gròzi pà disthìnu
e sòru un ròcciu d'amòri
pà pudèssi arriggì.
Abrìddi li jànni a Gesù Christhu""...
e fèddiru intra i li vòsthri còri
ghìsthu z'hài dittu cùn amòri
Ommu di pàzi
t'abèmmu sempri vìsthu.
i la tò vòzi
indi v'è mòsthi
s'intèndi lu tò arènu
lu pièntu tòu
nò è un zicchìrriu anzènu
ma è un aggiùddu
pà pusthà la nòsthra gròzi.
Pashònu hai dumandàddu a li cugini
e hai pasdhunàddu a g'ha mòsthu ti vuria
sigùru ghi a difindìtti v'è la vèrgine Maria
e li còri rànzigghi... abà so più vizini.
Hàggiu vìsthu pizìnni pignèndi
gióvani e vècci
cù l'òcci imbuffàddi
zèntu preghièri di sani e maràddi
pà un Ommu di pàzi...ghi sinn'èra andèndi.
Ma tu Bàbbu
di figliòri divèssi
l'amóri e la pàzi nò hàni curòri
la vèsthura tòa è bassèndi d'amòri
l'ippirànzi di pàzi
nò si so...mai arrèssi.
£ abà
ti ni sèi andàddu...ma nò z'hài lassàdddu
e ti vurìmmu sempri ammintà :
- abbrazzètta a li pòbari di zèntu curòri
- a mànu tenta cù li giòvani in fèstha
- basgèndi li maràddi e dèndi cunfòsthu
- giugghèndi a "pimpì e cuà" cù li criaddùri
- accarizzèndi li frònti sudàddi
- pignèndi pà lu duròri di l'àsthri
- cantèndi in zèntu fabèddhi
- zicchirrìendi la pàzi
impari a li sòsdhi putenti
- ma sempri : tucchèndi lu còri...di ugna òmmu.
(Giuseppe Fusco - Porto Torres
18.07.1951
Via Dante n° 2 - Porto Torres - tel. 079/502486)
Titolo | AVVIDEZZI...BABBU NOSTHRU |
Sezione | |
Autore | Giuseppe Fusco |
Nome | B20050027 |
Anno | 2005 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2005 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |