Informazioni sull'opera
AVRESCHIDAS DE ISPERA
Movent sos pensamentos che prellas atudas
in s'iscurigor' 'e disacatos
de una vida tribulada
ue mancias niedhas ruent in nibidos banos.
Sen'ispera sunt sos afetos de piantu
amigu neulosu de oras penosas
furadas a su sonnu illatzadu
de sudhos mai ingalenados.
Libertade
libertade....ite che faghes
si sas trobeas de sa migragna m'incravant a sa rughe
si ammentos d'antigorios tocant a isperu
intro su coro meu istasidu
si cumpanzos ebia sunt sos astudhos
in domo iscobertada
in carena sen'amina?
Ma
a lenu a lenu movet
s'ambasceri de sos bisos mios
a intregare su dillu de sas oras
e a pes mudos
si pesat sa brama
de arvores noos.
Su tempus de su 'entu
che mundhat sas pantasimas
de una morte primadia.
E intro su sinu
s'inchendhent sas lughes
de su Logu Biadu.
No mi timo prus niedhores de inferru
pro astragare su coro;
non chelos de tramas a cua
a punire sa note de surviles;
mai prus andhales de gherra o terrorisimu
ue trambucant o morint sos pitzinnos.
Avreschidas de ispera e abboghinos de dicia....
nidos de afetu e de calore....
tinnos de campanas in dies de festa
e musiga divina....
a contare batimos de Amore illacanadu!
Titolo | AVRESCHIDAS DE ISPERA |
Sezione | |
Autore | Istevene Arru |
Nome | B2004003 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |