G.S.PROFESSORESSA ¬ ED INSEGNANTE NELLE SCUOLE MEDIE DI SASSARI

AUGURI A DUE NOVELLI SPOSI

Ecco sa mezzu die de sa vida
Pro duos coros chi sun pro si unire,
Siat de mille benes arrichida
Sa vida ostra in su trattu avvenire;
S'Altu Deus bos potada assistire
Ogni ora, ogni attimu de sa Chida,
Maria cun Franziscu umpare unida
Ignoren de su mundu ogni patire.

Felice cogiu, su Deus de s'amore
Bos cherfesidi unire ambos umpare
Pro dare esempiu in sa Patria mia.
Fizu masciu bos diat su Signore
Chi siat in virtude un esemplare
E cumpletet in bois s'allegria.

(CIRILLO TRAVET)


PAESE DI TISSI

Es Tissi collocadu in d'un altura
De Portuturre dominat su mare,
Est imponente e bellu de figura
Possedit largas vias pro passare;
Ha fertile terra, inue sa natura
Ogni fruttu bi faghet prosperare,
Dat binu onu e abba pro sanare
De Pandora ogni male ogni margura.

Possedis Tissi meu amena terra;
As fizas bellas, castas in s'amore,
Ses famosu pro su tou bonu coro.
Tue ses patria 'e Bertulu e Serra
E de Cherchi su celebre cantore
Pro cussu chi ti giaman "bidda coro".

(CIRILLO TRAVET)