AUGURENDE SOS ISPOSOS

sos isposos novellos, tantu bene
Cuncedat, su divinu redentore.
Beneigat s'insoro sacru amore,
A gustu e piagher'e cantu crene.
Tenzan pro primu fizzu, unu fiore
Siat su antu de Roma e de At ene .
Nascat prus sabiu e dotu de Platone,
Siat, sa fama e onzi nassione

Cuntentos che a oe, ambos umpare
Custa vida terrena la passedas
Un'ora de anneu non tenzedas
De bos poder sa gioia leare
Butios d'abba cantu hat su mare
Gai bona fortuna bois lobredas
Chin cuntentesa passedas sos annos
Sanos, sempre umpare, a bezzos mannos.

SU GIAGANEDDU


ES TORRADA SA FESTA.

Torrat sa festa e torrat su giocundu
Momentu de recreu, ispassu e giogu.
Benit istranzos, dae onzi logu
Cantende, in tonu sardu, a ballu tundu.

Es festa namus totu, sos bighínos,
Nostra sennora est ' oe, in bidda mia.
C'hat musica, cuncursu e poesia,
Giostra, fogos de art'e ballarinos.

Mudadas sunu tottu sas carreras
Iscalinadas, piatas istradones,
Riende sun ' a festa sos balcones
Dae lughes, de rosas e lumeras

Galanas bajaneddas, paren fadas
Totta die in s'istrada, a fal'e piga.
Sas amigas, astringhene a s'amiga
E sunu tott'amore, sas miradas

Chittu pesadu chitto, si es compare,
Dae puddiles, chirchend' a Donosa.
Pro li fagher regalu, e carchi cosa
Li cheret, Pro sa festa cunbidare

A bol'istesu s ' iden, sos puzzones
Cantende, chin suave melodia.
Sos poettas, c'han dadu poesia
Sun lezende a boghe sas cantones

Est'incantu, consolu e cuntentesa,
Ider bezzones, torrados in brios,
Batias sun'a truma, chin batios
Tott'in su ballu nostru, a manu tesa,.

Paragonende onzi cosa bella,
faghet ispicu, sa portessione.
Unida, ripetende orassione
Sos anzianos, chin zente novella.

0 dies santas chi faghen godire
Recreu a su tristu coro umanu
Maria, chin sa tua fida manu
Potas, su mundu in paghe cunvertire.

Virgin'e su remediu, consola
A tottu, ma de pius su comitadu.
Su chi tantu ses sempre interessadu,
Pro d'onorare in terra sardigniola.

SU GIAGANEDDU


LODES A MARIA

MARIA e su REMEDIU giamada
Ses, da tottu sa zente pregadora.
A fideles e atteros ancora
Tenes benignia, sa tua mirada.
Ses in sos altos chelos coronada
De anghelos custodes a donz'ora
Naro biadu e felice a chie
Sezit, in paradisu, accurz 'a tie.

Perdonami biada, si peccare
Dia, chena lu cherrer ne ischire.
Però contivizzosu dev'istare
Pensende dae su malu de fuire.
No est prudenzia, a s'abbituare
Fagher peccadu, poi a si pentire.
Abbizzu devo esser, sempre attentu
A osservare, su cumandamentu.

Tue sanas feridas e anneos,
C'has divina grandesa e ses incantu
Sos cori duros, de peccados reos,
Perdonas, chin carigniu dulche ttantu
Tue s'affannu mudas in recreos
Ca ses mama amorosa e tottucantu.
Ses casta, immaculada e beneita,
Poderosa, de gloria infinita.

Gherradores rebeldes e bragosos,
C'han'infidele su faghere insoro.
Prenos de vanidade, ambiziosos
Chi toccan de s'onestu su decoro.
Pro los torrare in sestu, generosos,
Tue sennora; adurchilis su coro.
In modu fuat s'odiu, su fele
Dae s'omine barbara e cudrele.

Funtana bundanziosa, de salude
Ses tue, a s'intera umanidade.
Ispigiu luminosu de vertude
Lughe giara, de santa veridade.
Riparu e s'infelice zente rude,
Reina de puresa e santidade.
Tue biada Maria, mama e deu
Ses sa padrona, de su mundu intre

SU GIAGANEDDU