Informazioni sull'opera
ANCA EM'A 'OLLI ESSI
Chi arrenescessi a intzertai sa 'ia
aintr' 'e custu crachili scuriosu
chi trogat su tempus miu
e chi podessi arrenesci a stregai
is imprassidus de is nais
e lòmpiri anca em'a 'olli essi
em'a lassai buidu su mari
de undas giai scarèscias
e em'a abetai sa luna
spera ùrtima innantis chi si fetzat noti
po dda biri arrimendisì
e sciollendisì is pilus
in pitz'e su mari.
Chi podessi andai
passu passu
in su mori 'e su mari
faci 'e cuss'acòstiu 'e luxi
em'a fumai is busciacas
e a manu buida
ischiringendi is ogus
em'a torrai agatai arrùndilis in bòlidu
in is beranus nous de is pensamentus mius.
Chi podessi asumancu agatai
un'arroca frimma
sigura
de aundi fai intendi su coru miu
a is lavras de su 'entu
seu prus chi siguru
em'a sciri ancora bisai
pò mi campai custa vita.
Titolo | ANCA EM'A 'OLLI ESSI |
Sezione | |
Autore | Sandro Chiappori |
Nome | B20040023 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |