Ammaju antigu


In s'influssu 'e is astrus
un'isperanzia noa nascit candu sa luna
tottu sa terra indorat in is pranus
e montis imponentis senza 'e tempus.
In is undas tempestosas de su mari
chi sbattint'in is costeras
treminti is arregordus de animas bagantis
in s'umbra 'e su passau disperdiu de affannus.
Oh Sardigna mia! custu arregordai
mi fait camminai in sa strada deretta

est comente bolai in su campu 'e sa storia
cun visionis de figuras in sa memoria
svanidas in sa punta ancora bianca
de su' monti impratau in Gennargentu.
Su cantidu 'e muttetus chi risonanta
in is arrocas mudadas de matas
de ilixis de seculus prantaus
inui ancora pascit su muvroni
e currit su sirboni
chi nci papat su landiri gustosu

inui sartat su lepiri e c'imbucat
im mesu is tuppas de arrù mudadas
de arrideli e murta coronadas

inui nascit e currit a su mari su Flumendosa
sighendi a murmurai una canzoni eterna

in mesu lenaxis e tramatzus
in frori
chi ndi preninti su logu
de profumu alidàu de-su bentu.
Chiulus de pillonis parit sa chistioni
cun sa boxi de animas passadas.
In is argiolas bestidas de froris
rubius
asulus e grogus

ma prus non passanta is mallorus giuntus
a treulài trigu 'e is costeras.
Una boxi nd'arribat cun su bentu
de tesu
atesu meda

est su saludu de is emigraus
chi sindi funti andaus

ma tenint'in su coru
ancora meda amori po sa terra!