Trintasette retrogadu
fioridu in trinetta
tentu a maglia.

A UN'AMIGU


In custa amena zona Marghinesa
in sa funtana undante 'e poesia
un'amigu cunservo che tesoro.

A proe 'e bonu sensu e de decoro
oe lu servo in tonu reverente
comente frade dignu 'e ricumpensu;
a proe de decoro e bonu sensu
oe lu servo in reverente tonu

de decoro a proe e sensu bonu
in tonu reverente lu servo oe

de bonu sensu e de decoro a proe
in reverente tonu oe lu servo.

In custa amena zona marghinesa
in sa funtana undante 'e poesia
che tesoro un'amigu mi cunservo.

Inoghe in coro istima li riservo
e d'obblìgu l'onoro a boghe manna
in sa janna ch'abberzo a sarda rima;
in coro inoghe li riservo istima
e l'onoro d'obblìgu a manna 'oghe

istima li riservo in coro inoghe
a boghe manna d'obblìgu l'onoro

inoghe istima li riservo in coro
l'onoro a boghe manna e de obblìgu.

In custa amena zona marghinesa
in sa funtana undante 'e poesia
cunservo che tesoro unu amigu.

Sempr'e moda est s'ischidu ditzu antigu
obrante 'idu a roda 'e sa trattantza
si s'amigantza est che siddadu in nitzu;
sempr'e moda est s'ischidu antigu ditzu
a roda e sa trattantza obrante 'idu

sempr'e moda est s'antigu ditzu ischidu
obrante 'idu 'e sa trattantza a roda

s'eternu ditzu antigu est sempr'e moda
a roda 'e sa trattantza bidu obrante.

In custa amena zona marghinesa
un'amigu cunservo che tesoro
in sa funtana 'e poesia undante.

Si forte appera un'arte appaghiante
de sana sorte andera l'abberia
che ghia amparadora in donzi parte;
s'appaghiante appera forte un'arte
de sana sorte l'abberia andera

si forte appaghiante un'arte appera
andera l'abberia 'e sana sorte

s'appera appaghiante un'arte forte
de sorte l'abberia andera sana.

In custa amena zona marghinesa
un'amigu cunservo che tesoro
de poesia in s'undante funtana.

Est custa nostra imbastidura umana
cria edusta che giostra rodiante
sutta calante luna 'e paga dura;
est custa nostra umana imbastidura
cria che rodiante edusta giostra

est custa umana imbastidura nostra
che giostra rodiante cria edusta

est nostra umana imbastidura custa
che rodiante giostra edusta cria.

In custa amena zona marghinesa
un'amigu cunservo che tesoro
in sa funtana undante 'e poesia.

Issu cantende in sa terra nadìa
ad'intesa che missu andende a proa
che noa lughe isparta in badde e serra.
Issu cantende in sa nadìa terra
ad'intesa che missu a proa andende

in sa terra nadìa Issu cantende
andende a proa ad'intesa che missu

in sa nadìa terra canted'Issu
andende a proa che missu ad'intesa.

Un'amigu cunservo che tesoro
in sa funtana undante 'e poesia
in custa amena zona marghinesa.

Eo che Dante no appo s'artesa
in s'Elicona arreo fante rasu
ca in Farnasu lanzas tulas tzappo;
che Dante deo s'artesa no appo
arreo in s'Elicona rasu fante

s'artesa deo no appo che Dante
in s'Elicona fante rasu arreo

che a Dante s'artesa no app'eo
rasu fante arreo in s'Elicona.

Un'amigu cunservo che tesoro
in sa funtana undante 'e poesia
in custa amena marghinesa zona.

Amigu caru iscrie in muta 'ona
in s'ena ch'as abbigu 'e laru tinta
pinta chin lumas de ispera allutta;
iscrie caru amigu in bona muta
in s'abbigu ch'as s'ena tinta 'e laru
in bona muta iscrie amigu caru
in s'ena tinta 'e laru ch'as abbigu

iscrie in bona muta caru amigu
in s'abbigu chi tint''e laru as s'ena.

Un'amigu cunservo che tesoro
in sa funtana undante »e poesia
in custa marghinesa zona amena.

Bide sa farta mia esclusa 'e pena
azzetta in fide arta sughi naro
già chi reparo pedendedi iscusa;
sa farta mia 'ide 'e pena esclusa
azzetta sughi naro in fide arta

esclusa 'e mia pena 'ide sa farta
sughi naro m'azzetta in arta fide

sa mia farta esclusa 'e pena 'ide
in fide arta sughi naro azzetta.

Che poeta ch'istimo ti fentomo
chin custu trintasette fattu apposta

nende ch'a tie
goi
una risposta
ti la devia tempus prima 'e como !!


Pinuccio Giudice Marras
nato a Bono
il 7 Maggio 1924
residente a Macomer
in Via Buonarroti n° 35
tel. 0785/71285