A SA MADONNA DE SU RIMEDIU


Maria ses Reina e ses'Istella,
Anghelos Ti corteggian notte e die,
rosa tra sos fiores pius bella
in candidesa superas su nie.

Aurora ch'in firmamentu rie
virtuosa e pura verginella
innalzo custu cantu deo a Tie,
Rocca de fortilesa ite novella.

Giocunda e umile in coro
immune de peccadu e senza neu
nobile tue sese unu tesoro.

Eva novella su mundu Ti giamma
Rimediu de s'afflitta umanidade
salve, o Maria, salve, o Mamma.


A MARIA VERGINE S.S.

Amore de s'Ispiridu Divinu
ses Maria de grazias piena,
Mamma de su Deus Unu e Trinu,
albure nada in badde amena.

Ricca de donos Tue ses savena
immensu de fiores ses giardinu;
as superadu bellesa terrena,
de chelu ses fragrante gelsominu.

jEs Maria in sa Corte celestiale
coronada de gemma risplendente
opera de s'Artefice Immortale.

Rosas margheritas de candore
tulipanos lizzos e gravellos
esaltent oe a tie cun amore.


LAMENTU
Su puzzone cantende,
cun dulce linguaggiu,
annunzia ridente su eranu;
faghed'a cumprende
chi vicinu est maggiu:
gentiles fiores ada in manu.
E deo osservo ebbia
sa trista e penosa vida mia.

Variados colores
tessid'ha sa natura
chi delizia formana in su coro;
ma chie ha dolores
affannu e tristura
nudda godi de custu tesoro;
ende arriva maggiu
pienu de disgustu e de disaggiu.

In s'apposentu sola
m'indisto notte e die
che turture in gabbia serrada.
Su pensamentu ola
su coro pius non rie
bidindemi goi abbandonada;
e cun flebile oghe
su piantu m'accorad'innoghe.

Ancora in birdes annos

cando sa maladia
ha fattu in me a-sentamentu:
non connoschia affannos
e mancu bi nen ai
chi tantu duru fu su patimentu.
Como app'osservadu
chi a patide puru est cumandadu.

E cantu lu disizzo
de essede sanada
cun su coro pienu de allegria;
eppuru minde abbizzo
chi non so sollevada;
de continu est sa mia maladia:
e so' vintises'annos
in mesu a dolores e affannos.