Informazioni sull'opera
Est pàsidu su mare,
pagas undas
lenas donant carignos
a sa rena.
E serena est s’aera,
chena nues
ne perunu minetu de tempesta.
E m’infundo de gosu
e de isperas,
mentres colant sas oras
de su tempus pressosu
e fuiditu.
Ma l’apo ’idu puru
arrennegadu,
mazàndemi sas undas sa carena,
trazandemiche attesu
da’ sa terra,
ube onzi bene meu
fit regoltu.
Ma non fit ora
ancora e mi ch’andare,
sa sorte fit cun megus;
mi nd’at torradu insegus
s’unda amiga.
Como est mudu su mare,
eppuru timo
ch’a pesare si torrent
undas altas,
fizas de s’abbolotu
e de sas fartas
in sas intragnas mias
abbuadas,
in dies de turmentu
cumbatadas
ch’in s’ànima s’imprenta
m’ant lassadu.
E s’orizonte miro prus allargu,
gosand’ ’e sa fortuna
de bidere su sole de s’atunzu
e sa lugh’ ’e sa luna in nottes jaras.
Titolo |
Undas |
Sezione | Poesia Sarda Inedita |
Autore | Giangavino Vasco |
Nome | |
Anno | 2023 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 2023 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |