BANDU 2023: SA DE 64 EDITZIONES

BANDU DE SU CUNCURSU 2023

Iscadèntzia su 31 de maju 2023

Su Prèmiu de Otieri, fundadu dae Tonino Ledda in su 1956, contivizat atividades chi agiuant sa cultura, sa limba e sa literadura de Sardigna.

RÈGULAS DE PARTECIPATZIONE

  1. Sunt ammissas a su Prèmiu sas òperas in limba sarda e in gadduresu, tataresu, saligheresu e tabarchinu.
  2. Totu sas òperas devent èssere inèditas e non devent àere àpidu reconnoschimentos in àteros cuncursos literàrios a sa die de s’imbiu. 
  3. Si cuncurret a s’indonu e non benit pedida tassa peruna.
  4. Dogni cuncurrente podet imbiare finas a tres òperas, una pro dogni setzione.
  5. Sas setziones de su Prèmiu sunt:
    1. POESIA SARDA “Antoni Sanna”. Dogni cuncurrente podet imbiare una poesia a tema lìbberu, cun rima o chena rima. Sa poesia non che devet colare sos 40 (baranta) versos.
    2. PROSA SARDA “Tonino Ledda”. Dogni cuncurrente podet mandare unu contadu. Su contadu non che devet colare sas 5 (chimbe) pàginas in frommadu A4, cun corpus 12 e totu sos oros postos nessi a 2 cm.
    3. TRA POESIA E CÀNTIGU “Antoni Cubeddu”. Dogni cuncurrente podet imbiare una cantone a tema lìbberu, sighende sos ischemas e sas frommas poèticas e mètricas ligadas a su connotu (nìnnidos, atìtidos, glossas, cantadas in lira, gosos, cantones torradas, modas, modellos, mutos, repentinas etc.).
  6. Sas òperas devent èssere iscritas a màchina o a computadore.
  7. Sas òperas devent giùghere iscritu, in finitia e in dogni còpia, nùmene e sambenadu de s’autore, data e logu de nàschida, s’indiritzu, su nùmeru de telèfonu e sa posta eletrònica ue si diat chèrrere giamadu pro dogni bisonzu.
  8. Sas òperas anònimas o cun pseudònimos non ant a èssere ammissas.
  9. Si podet imbiare finas carchi riga de curriculum e novas subra a s’autore.
  10. Est agradessida una tradutzione in limba italiana e/o unu glossàriu de sas paràulas pius pagu nòdidas.
  11. Sos trabàglios devent giòmpere a su Prèmiu intro de su 31 de maju 2023 in d-una de custas maneras, a sèberu de su poeta:
    1. imbiende sos trabàglios a s’indiritzu de posta eletrònica Questo indirizzo email è protetto dagli spambots. È necessario abilitare JavaScript per vederlo.;
    2. imbiende 1 (una) còpia de sos documentos cun sas òperas in pabilu a:  Segreteria de su Prèmiu Otieri de Literadura Sarda Via Ugo La Malfa, 28 – 07014 Ozieri (SS).
  12. S’at a tènnere in contu de sa data de s’imbiu de sa posta eletrònica o de su sizillu postale.
  13. Chie imbiat sos trabàglios in posta eletronica devet iscrìere sa setzione in s’ogetu de su messàgiu (es.: Setzione Prosa Sarda «Tonino Ledda»).
  14. Chie imbiat sos trabàglios in pabilu devet iscrìere subra a sa busta su nùmene de sa setzione (es.: Setzione Poesia Sarda «Antoni Sanna»).
  15.  Sas òperas ant a èssere giuigadas dae sa Giuria de su Prèmiu, chi est frommada dae:
    • su presidente Dino Manca;
    • sa vicepresidente Anna Cristina Serra;
    • sos giurados Cristiano Becciu, Antonio Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.
  16. Su giudìtziu de sa Giuria est insidacàbile.
  17. A sos primos tres classificados de dogni setzione s’ant a dare sos prèmios chi sighint:
    1.  Assegnu de € 500 e targa pro ammentu
    2. Assegnu de € 300 e targa pro ammentu
    3. Assegnu de € 200 e targa pro ammentu
  18. Sa Giuria podet finamentas assignare prèmios ispeciales.
  19. Sos binchidores podent torrare a bìnchere in cussa matessi setzione solu a pustis de 2 annos.
  20. Sos premiados ant a retzire un’avisu dae sa segreteria de su Prèmiu.
  21. Sa premiatzione s’at a fàghere s’ùrtimu sàpadu o s’ùrtima domìniga de santandria de su 2023.
  22. Sas poesias e sas prosas premiadas, paris cun cussos chi sa Giuria dessignat de imprentare, podent èssere postas in su cuadernu antològicu annuale.
  23. Sos documentos non benint torrados insegus e su Sòtziu si reservat sa facultade de pubblicare sas òperas cando e comente podet capitare, finas in sa ràdio, in sa televisione e in sos mèdios telemàticos, chena pagamentu perunu a s’autore. S’autore, però, est semper padronu de s’òpera chi at iscritu e nde podet dispònnere a piaghere sou.
  24. A leare parte a su cuncursu cheret nàrrere chi s’autore atzetat in pienu sas règulas istabilidas dae custu bandu.

 CENTRU DE DOCUMENTATZIONE

Su Sòtziu Premio Ozieri di Letteratura Sarda est cogliende totu sos trabàglios chi pertocant a sos poetas e a sos iscritores de Sardigna: maniscritos, lìbberos, fotografias, filmados e àteru. Semus costoende inie totu su chi amus retzidu in sessant’annos e pius de impignu nostru e bostru, pro lu lassare a eredade a istudiosos e a amantiosos de oe e de su benidore, a manera de sighire sas àndalas de un’idea chi non morit. 

S’atividade sighit annu cun annu, cunfromma a sas possibilidades nostras, finas chi bi resurtet totu su chi su Prèmiu at retzidu dae cando est nàschidu. Carchi duda b’est ancora: pro more chi sos trabàglios che los imbiaiant anònimos (finas a su 1980, dae pius a mancu), cun su pseudònimu o paranùmene o cun d-unu motu, a dolu mannu no essint a pizu nùmene e sambenadu de sos autores.

Chie est a tretu de nos pòdere agiuare pro cumprèndere nùmene e sambenadu de sos autores de sas òperas anònimas podet iscrìere a:

    1. Questo indirizzo email è protetto dagli spambots. È necessario abilitare JavaScript per vederlo.
    2. setzione Contatti de su situ www.premiozieri.it (in ue si podet bìdere su trabàgliu fatu finas a oe)
    3. Centru de Documentatzione de sa Literadura Sarda - Via Amsicora , 3 – 07014 Ozieri (SS)

Sos autores chi sunt interessados a lassare, dae como o unu cras, a su Centru de Documentatzione “Tonino Ledda”, totu o in parte, sa produtzione literaria e documentos issoro, nos lu podent fàghere ischire a sos matessi indiritzos.