Aìami tarreni boni di laurà
chi no ‘emu lauratu a tempu sóiu
e vigni di scalzà
chi pal frigulitài
no ani ‘istu zappa
illu só’ briddà di la pratta.
E simenzi sciuarati aìami
cantu di meddu s’agatta
e bracci boni
di pudé stirrì illu graniatoggiu
pal punì a tricu
chèvii ùmmidi di sainaglia.
Ma abà, c’ha un soli ch’abbaglia
e altu nudda no vicu
sinnò che alba sicca crescì
e òldini magnati da la ràmina,
tempi mali, chen’ànima,
ch’ambarani ‘nvanu
l’ùltimi fóchi di débbi
pal turrà a pruà a cumincià.
Aìami tarreni boni di laurà
chi no ‘emu lauratu a tempu sóiu
e iddi érani chi’ ambarendi
chi nói li déssimi
sustanzia, ispirienzia,
lu sapé e lu cunniscimentu
pal fa buttà gjemi nói o fióri nuali
e pinà lu bóitu sóiu
chi sarìa statu lu nostru cumprimentu.
Ma no semu stati boni
a siminà cu’ amóri chissi sulchji
a fa chi no fùssini
intumbiti e cunfusi in middi pelchji
e pói palduti e vinti
li tènnari puddoni di dugna pianta
e dalli l’ali pal pudé bulà
pa’ esse gali, criaturi di chistu mundu:
‘chì l’omu s’aganta, si teni a galla
ma no ci cola a fundu.