Si b’at luas chi seddant sos beranos
cun tristuras e francas de astore
fide non perdas nen cuddu lugore
de s’ispera, in coro, liga ranos...

Frinas cun bentos mi torrant in manos
serentinas chi sos ammentos forrant
in manos frinas cun bentos mi torrant
serentinas chi forrant sos ammentos
in manos frinas mi torrant cun bentos
sos ammentos chi forrant serentinas
s’intro s’ànima ponet raighinas
su pensu chi mi paret un’istiga...

Si b’at luas chi seddant sos beranos
cun tristuras e francas de astore
fide non perdas nen cuddu lugore
de s’ispera, in coro, ranos liga...

Faeddu nd’as sestadu a s’antiga
cun un’isteddu a su cras ligadu
a s’antiga faeddu nd’as sestadu
cun s’isteddu ligadu a unu cras
faeddu a s’antiga sestadu nd’as
ligadu a su cras cun un’isteddu
pro chi ternuras siant foeteddu
cando s’istima non lughet de oro...

Si b’at luas chi seddant sos beranos
cun tristuras e francas de astore
fide non perdas nen cuddu lugore
s’ispera liga de ranos in coro...

Sea balente mi ses e t’adoro
sa trobea caente, si bi crees
e t’adoro balente , sea mi ses
sa trobea, si bi crees, caente
t’adoro e mi ses sea balente
sa caente, si bi crees, trobea
como chi bido in una bidea
sos ojos tuos pintos in s’aera...

Si b’at luas chi seddant sos beranos
cun tristuras e francas de astore
fide non perdas nen cuddu lugore
in coro ranos liga de s’ispera...

Pazosu cantas raju de lunera
chi s’isposu l’ammantas a s’amaju
cantas pazosu, de lunera raju
a s’isposu s’amaju chi l’ammantas
raju pazosu, de lunera, cantas
s’amaju chi l’ammantas a s’isposu
pro cuddu risu durche pibiosu
chi tessit sos sentidos prus arcanos...

Si b’at luas chi seddant sos beranos...