Undi v’era la scola v’è una piazza
avà. Manna,
esageradda, a dì allegra
che un àlburu di branu, in altri
cu’ la malincunia
di li spiàgghji passaddu l’istaddiali.
A volti, passigghièndivi innantu,
mi parì d’intindivvi
l’allegri buldeddi chi sìghini
lu drìììn di la campana,
sciummendi la buccagna
a osu scetta di funtana
afficosi cari ridenti,
panneddi nieddi e fiocchi
groghi, azzurri e rui
a cuà calzoni zappuladdi, botti
fammiddi e ghjnòcchji cu’ li bui.

Si m’arrègghju intendu finza
in appellu la mastra sruddulendi
un nommu fattu a l’altru
chi impoddu ad accullucà
i’ la fotografia rimusa i’ la mimoria.
Pogghi n’appàgghju, umbè
mancu mi l’ammentu, tanti
sò passaddi chena dassà segnu
e lu restu l’ha fattu lu tempu
i’ la so’ isfidiadda facultai.
Ghjà, lu tempu... No v’entra
la scola primma, né la piazza avali,
neppuru li cumpagni di tandu,
no, altru conta, altru t’addulora...

Piùprestu, cun inghì la scola
nemmancu si vidia lu mari!