In s'ultim'orizu
de su chelu mùrinu
chighiristas de fogu
allùmmana sa chima 'e sas olias.
Chijinattas umbras s'incascana
subra sos nòdidos montes luntanos,
sos siccos baddijos cavaccana
de ìnnida tristesa ammajàda:
primmadiu incominzu
de s'interighinada.
Eàlla s'ischina sabia 'e babbu
ingrusciàda
isarghende su trigu aupadu:
saliosa prommissa
de pienas incunzas fidadas.
In sa pischina 'e sas nadas
boidos inzomadores iscabados
sighin a tesser binchizas de frina:
chena madrighe non pesat su pane
e cheret fache allutta sa faddija!
Temporadas de lughe 'ajana
m'illùinan s'anima
e iscùttinan sas naes de su coro:
sincheros fruttos che abba 'e fontana
falan subra sa 'irde coltina.
E giutto in ojos a tie
terra ch'in dossu ti frien
istoccadas salidas.
A boltas mi paret chi tue hapas tentu
a mastra 'e partu
sas dies umbrosas e mudas ancora
de fieros nuraghes dirruttos.
Ma si appenas sas nues allenan
sas nieddas timìdas giannas insoro
che crabolu in sos aidos ruppo
imbreagu de isteddos rebelles
e cun atza ladina su sole trobeo.
Boghes de chertu e suore mi giamana ... !
Sa luna che tacca 'e sambene
pendet in punta 'e s'elighe mannu.