Innoi is faulas no agatant terra màina
ca oi tottu est mudau
e nudda est mudau.
No fìat sa propiu cosa intzandus
su colori de s'acqua, de sa terra
e su sonu de i' bias.
A i' beccius praxit contai
istorias de atrus tempus,
ca no intendint su sirboni
forrogonendi a su notti
accanta de s'urtima domu de s'argiola
e no intendint sa boxi de sa mata
incrubada de su bentu
e su muiu de i' bois me is istaddas
is origas paradas a su tronu de flùmini
de is arrius
no abbillant a s'6ru 'e sa forredda
e no bint su stori
barracellu de su celu,
su lèpiri a pabas de unu fondu de gureu.
I' beccius no si scint arrimediai
po is piccioccus partius
i' festas chena prexu
che festas de sa morti
is argiolas fattas a cinau
i' nebodis mai connotus,
is contus longus
chi nisciunus podit ascurtai
po crupa de una lingua de genti furistera.
E intzandus cantant a solus cantzonis antigas
e contant a issus a tottu istorias ispantosas
e bint su stori furriotendi in celu
e pigant su fosili po su sirboni
chi scorrovetat in s'6ru 'e s'enna
e si ndi àmpuant a su notti
po appallai bois chi tzerriant a nomini,
Innoi is faulas no agatant terra màina
ca oi tottu est mudau
e nudda est mudau.