Candu passu in cussu strintu de idda mia
intendu una oxi tremi tremi
chi essidi de cussa omixedda ecc1a
e curridi in cussas aria' frida' de ni
comenti currinti i' nuis cun su entu.
I' beccius in is corrazzus oprigaus
arregodanta s'edadi chi no torrada
e fueddanta de su tempus
chi hariti biu frimendisì anant' 'e issus.
Candu sa dì si nn'andada, cussus ominis,
chi mi paridi de hai connotu sempri eccius,
si salludanta nendu: a crasi, a crasi
e castianta s'urtimu ogu de solli.
Intendu oxis tristas e alligras,
boxis de genti chi prangi' sa mallasorti,
boxi' de genti chi no prangi' prusu,
boxi' de mammas,
boxi de fillus
e boxi' bagamundas.
Candu happa torrai a intendi
cussa boxis aillagru
zerriendu a sa porta de omu mia?
Cussa' boxis chi mai no arribanta
aspettu dì e notti po mi nai
chi crasi had'a torrai su eranu
e had'a torrai cussa bella dì de solli
po podi intendi funtanas e arrius
currendi in mesu 'e sa scraria in frori.
Candu tira su entu de Gennargentu
e su merì è sempri prusu scuriosu,
sa teulla de cussa omixedda eccia
nd'arruidi de crobetura a una a una
e in s'imperdau si faidi in centu arrogus.
Atru' sonus, ancora, e atra' boxis
a de notti mi zumianta in origas,
tremi mi fainti che canna
e penzu a sa dì de cras cun pagu abetu.