A REMUNDA


Non disisperes Remunda
Ispera in su Criadore
Si has potente su dolore
Issu, hat de salude un'unda

Chie disisperat morit
Cun su coro avvelenadu
Est un'orrendu peccadu
Chi sa virtude iscolorit
E in s'istante isfiorit
Sa fide vera e profunda
Gai,cale pedra tunda
In s'abb'a s'inferru falat
a Giuda s'aggualat
Non disisperes Remunda!

Lea in manos su rosariu
Sa mezus pregadoria
Gai su fizu e Maria
Su martir'e su calvariu
T'had'a dare nezessariu
Coraggiu in tantu rigore
Ispicchende unu fiore
Da-e sas ispinas suas
Balsamu a sas penas tuas
Ispera in su Criadore

Tranquilla e calma t'ista
Pro sos divinos aggiudos
Si dàt sa limb'a sos mudos
E a sos zegos sa vista
Tue puru ses in lista
De-i cuss'immens'amore
Chi su mundu peccadore
In sa rughe hat redimidu
Mira cant'Issu hat patidu
Si has potente su dolore

Cun su coro assussegadu
Ama s'eternu cunfortu
Lazzaru puru fit mortu
E fit tant'ora interradu
Ma daghi Mart'hat pregadu
Torrat feliz'e giocunda
Ca da sa fossa profunda
Biu su frade ndi essit
Deu a tottu resessit
Issu hat de salude un'unda

Non disisperes Remunda
Ispera in su Criadore
S'has potente su dolore
Issu, hat de salude un'unda

Andria Ninniri