Falat lezzera dae sas aeras
sa fitta fìoccada 'e neutrones.
Passat sas bidrieras,
sos muros de granitu,
lampat radiasciones
mortales in sos ultimos cuzones.
Ti 'occhit sos pizzinnos in su lettu
in calda nott' 'e maju cando sunu
sonniende pudderigos briosos,
brinchende che crabolos,
in tancas de lidone e iscareu.
Gai sa dulche isposa
chi t'istringhes a pettus,
cale dechida rosa,
e t'offerit sas laras purpurinas,
su sinu delicadu
bramosa solu de s'ider amada.
Cando pius sa vida est preziosa
e gustas ogni istante
e sa mente in delirios ti fìgurat
istrampos de rizolos cristallinos
in baddes delisciosas
e ciarras de puzones in sos nidos
e pares rutu in mesu
de milli muliones de fìores;
tando una frizza muda

ti trapassat su coro,
ti pienat sa ment' 'e nieddore,
t'assaccarrat sa notte
de sa gelida morte -tenebrosa.
Su carovulu ruju in su balcone
s'agabbat a allizare
ca s'amorosa manu
non benit a l'abbare.
E s'in su campu torrat a brottare
sa mendula in beranu
e torrat sa campagna a fiorire,
a ite 'alen profumos e colores
cando pro los mirare
non b'hat ojos ne coro a los godire?