Informazioni sull'opera
TESTO
Ponidemiche sutta de una pedra
menzus s'est de granittu
ca su marmaru est frittu
de lussu meda e no b'attaccad edra.
Ponidemiche a fazza de su nuraghe
e s'ancora est de usu
iscridebei susu
«Inoghe solu est riposende in paghe».
Ponidemiche nessi calchi rampu
de murta e de lidone,
rosas a su barone
a mie bastan fiores de campu.
Ponidemiche in logu solianu
a palas de su muru
si non disturbo, puru
una rughitta ca sò Cristianu.
Bramo torrare a ue sò naschidu
est s'ultimu disizu
Sardigna de custu fizu
chi Tue has generadu e c'has frundidu.
SCHEDA DELL'OPERA
| Titolo | S'ultimu disizu de un emigradu |
| Sezione | Poesia Sarda Inedita |
| Autore | Antonio Manca |
| Nome | |
| Anno | 1976 |
| Argomento | |
| Descrizione | |
| Lingua | |
| Editore | Premio Ozieri |
| Contributore | ATHENA SRL |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 1976 |
| Copertura | Logudoro, Sardegna Italia |
| Diritti | Comune Ozieri, Premio Ozieri |
| Analisi del Testo |