Cudda notte passada
mi so isionadu; e nachi fia
girande cussa terra avventurosa
ch'est sa Sardigna mia
in dogni parte e via
mi pariat de bider e passare.
Comente in cust'impresa resessera,
non l'isco raccontare.
Poto sol'affirmare
ch'idia campos, forestas e rios;
pasculende crabolos e murones;
puzones io sos oios,
e de sos ojos mios
no haian peruna impressione;
fit tottu paghe, gosu e armonia:
una ver'istajone
de una bisione !
Sas de s'istiu timidas caldanas
non daiana perunu pensamentu:
bundantes sas funtanas ·
de lezeras e sanas
abbas agataia in dogni logu.
Pastores e massajos non timian
de s'azzender su fogu,
pro dispettu e pro giogu
de chie perdet s'usu 'e sa ragione!
Cosa chi mai si det poder bider
si no in bisione!...
Mai un'azione
de samben, pro vinditta e pro ricattu
usaiat committer prus nisciunu;
ne b'haiat ingratu
coro, chi soddisfattu
non cherzerat s'amigu cun su frade!
Fit motivu de briu e de cuntentu
sa generosidade.
Profonda umanidade;
sensu, fide e vera passione
tottu beniat; ma ecc' a sa fine
fit una bisione ...