Bois chi sa Sardigna guvernades
fattendenos sa solitas promissas,
sempre cussas, dogn'annu rinnovadas,
a una cosa no azis pensadu,
chi pode cras'e tottu capitare.
E si nos istuffamus? ...
De vivere in sa neula,
de nde falare dai sos pontiles
e chi restare intro su cimentu,
de morre sutta terra,
d'esse male trattados
e odiados che zente inzivile?
E si nos istuffamus? ...
De disizare a giogare a sa murra
de cantare a chiterra
de fagher su cuncordu, su tenore?
E tando? Ite faghides tando?
Si est ch'in d'una die signalada
approdamus a Olbia, s'Alighera,
Cagliari, Portu Turra, Muravera,
e unidos che unu bulione
ch'inue passat, lassat s'istradone,
gridende a boghe arta:
- Fora dai Sardigna
sos sardos pagu sardos
chi ogn'annu rinnovan sas prom1ssas. -
E tando? Ite faghides tando?
Si cun forza gridamus a su 'entu:
- Pesadebonde mortos,
nois semus torrados
a bos dare su asu
s'urtimu asu chi no azis tentu! -
Benide tottu,
poveras battias,
chi su piantu no bos è bastadu
a toccare su coro e sos maridos,
e i sos fìzos bos ana lassadu
pius de primmu nudos e famidos!
Benide tottu,
isfruttados de ogni zenia,
bezzos chenza un'ispera,
chi azis bidu binzas e olias
siccas in primaera!
Benide tottu
giovanos amados,
ch'in su mezzus fiore
sezis chenza surrisu isfìduzados,
invez'e currere a faghe s'amore!
Benide tottu,
zente istudiada,
persones de cultura,
dadenos una manu
a caminare i sa via segura!
Benide tottu,
fìzzos e muzeres
mamas isconsoladas,
appoggiade sa testa in sinu nostru

e pianghide de sa cuntentesa
pro s'ora tantu attesa!
Nois semus torrados;
pro no restare mai pius solas
pro fraigare iscolas
pro nde pesare domos e bacchiles
pro fondere so fusilese in arados
pro sonare a festa sas campanas
pro nd'istudare s'odiu, sa vinditta,
pro torrare s'amore a d'ogni coro
pro piantare fìores de oro
in custa terra santa e beneitta!
E tando? Ite faghides tando?
Pansade: cussa die pode' bennere!!