Sos sardos
sunu roccas
chi brillan
che diamantes.
Sunu chercos
chin radichinas
profundas
chi non timene ventu
né tempestas.
Sun sirvones de buscu,
puzones de s'aera,
cavaddos in libertade
chi non si lassan domare.
Zent'e icadu sunu
ma peri zent'e coro.
Sos sardos
esiliaos
sun preduscedda 'e rivu
cussumada dae s'abba.
Sunu che poveras cannas
iscuttas dae su ventu.
Truncos chene radichinas,
sunu brazzos
ass'incantu,
sunu rivos de sudore
supra e su pan'istranzu.
Rundines sunu
chene nidu,
mareas che andan
e torrana,
mareas chi torran
e andana
e no si poden firmare
in s'amada
terr'issoro
uve lassau an
su coro.