Umbras chi mi pessichides,
ammentos de cosas lassadas,
felicidade imbolada
mai bastante godia
mai bastante apprezzada.
Ammentos de una povera domo
cena 'e povera zente
ricca 'e umanidade,
ch'iscìat piangher'e rier.
Ammentos, sicchidemi a pessichire,
dademi unu vistir'istrazzau
e duos pedes pizzinnos
pro currer'in mesu s'erva
lucchida 'e lentore
uve chircavo viores.
Dademi unu pane crasau,
unu pane nigheddu saporìu,
pane de massajos,
de pastores, de transumanzas.
Dademi unu pane de Ozieri,
pane modde, biancu,
dae semper offriu
chin su coro a s'istranzu.
Cantademi su cuncordu
e una disisperada
a sonu 'e chitarra
in d'una nott'e veranu.
Dademi unu cavaddu
pro andare a sa 'esta 'e campagna
uve arrostin sos porcheddos
e ballan su ballu tundu.
Dademi sos bezzos de prima
amaos e rispettaos,
ch'in sas nottes de iverru
e inghiriu e su ochile
mi contavan de bandidos,
de zigantes e de janas.
Ammentos de cosas amadas
sicchidemi a pessichire,
acchidemi piangher'e rier,
acchidemi campar'e morrer,
unu pacu cada die.